Konkurransen omfattar etablering, drift og vedlikehald av ny døgnkvileplass for tungtransport langs den seks mil lange strekninga nord for Sognefjorden.

Frist for prekvalifisering er 24. oktober klokka 12.00. Frist for å levera tilbod er 25. november klokka 12.00.

Tilbodskonferansen finn stad 30. september klokka 13.00 på Teams. Her finn du lenke til utlysinga.

Det er aktuelt å inngå kontrakt med ein privat aktør/leverandør. Statens vegvesen legg opp til ei ordning med betaling for årleg leige.

Dette er krava til døgnkvileplassen

– Det er behov for mellom 12 og 15 oppstillingsplassar på strekninga. Vi krev at døgnkvileplassen må ha serviceanlegg med toalett, dusj og oppholdsrom/spiserom med moglegheit for matlaging, seier byggeleiar Andrea Holsen Horstad i Statens vegvesen.

Køyreavstand frå E39 til døgnkvileplassen skal vera maksimalt éin kilometer.

Det vil bli etablert ladeinfrastruktur for tungbil.

Kvifor døgnkvileplass?

Målet med denne anskaffinga er å gje eit betre tilbod til tungtransportsjåførar som skal gjennomføra normal døgnkvile, redusert vekekvile (maks 45 timar) eller ta pausar (45 minutt) innanfor regelverket om køyre- og kviletid.

Køyre- og kviletidsreglane pålegg sjåførane som køyrer tunge bilar å ta pausar og kvila tilstrekkeleg lenge til å få ein normal søvnperiode.

Utkvilte sjåførar er trygge sjåførar. Trygge sjåførar er oppmerksame sjåførar som bidreg til  betre trafikktryggleik for oss alle, i tråd med nullvisjonen for drepne og hardt skadde i trafikken.

Statens vegvesen ynskjer å vera ein ansvarleg vegeigar for alle trafikantar.

Å leggja til rette for at tungtransportsjåførar kan ta si lovpålagde døgnkvile, er ein del av dette samfunnsoppdraget.

Når skal døgnkvileplassen opna?

Statens vegvesen ønskjer å signera kontrakt våren 2026, og opna døgnkvileplassen innan 1. januar 2027.

Avtaleperioden gjeld i utgangspunktet 10 år, men opsjon for leigetakar å forlenga avtalen 1 + 1 år til totalt 12 år.

Statens vegvesen har døgnkvileplassar over heile landet. Oversikta finn du her.