Skildring av prosjektet

Gjennom å bygge ein ny tunnel på E16 forbi dei øvre delane av Nærøydalen og Stalheimskleiva, skal europavegen leggast vekk frå skredutsette område mellom Hylland og Glashammaren. Vidare skal Sivletunnelen og Stalheimstunnelen, som ikkje tilfredsstiller krava til tryggleik som er gitt i tunnelsikkerhetsforskrifta, verte avløyst av den nye tunnelen.

Prosjektet er omtalt i Nasjonal transportplan 2025-2036, og er sett opp med oppstart og fullfinansiering i planen sin siste seksårspeiode (2031-2036).

Fordi prosjektet strekker seg over to kommunar, er det dekka av to reguleringsplanar. Ein for den delen av prosjektet som ligg i Voss herad og ein for den delen som ligg i Aurland kommune. Begge reguleringsplanane vart vedtekne hausten 2016. Gjeldande planar finst på www.kommunekart.com.

Føremålet med planarbeidet

Føremålet med å endre den reguleringsplanen som gjeld for prosjektet i Voss herad, er å redusere kostnadar, klimagassutslepp og negative verknadar for ytre miljø, som prosjektet fører med seg. Konkret vil ein i planarbeidet arbeide med følgjande endringar:

• Flytte tunnelpåhogget mot nordaust, og etablere veg i dagen i staden for veg i tunnel i områda aust for Flatland.
• Tilpasse løysinga til tidlegare avgjersle om å ikkje ha tre køyrefelt i tunnelen og ut i dagsona på Vossasida av tunnelen. Dette var og er ei overdimensjonering i høve til vegnormalane sine krav.
• I gjeldande plan, er det lagt opp til å bygge ein ny parsell av Slænsvegen i skog og over dyrka mark, for å knyte seg til kryss på ny E16. I staden vil me legge opp til at gang- og sykkelvegen langs E16 sør for krysset, vil bli ein sideveg for køyreande, som knyter den eksisterande Slænsvegen til krysset.
• Enkelte mindre justeringar av tidlegare planlagt geometrisk utforming av veganlegget, og større gjenbruk av eksisterande infrastruktur, for å redusere arealbeslaget.
• Få på plass andre løysingar for handtering av masseoverskotet, slik at regulerte deponiområde kan reduserast og/eller takast ut av planen.

I tillegg er det oppdaga enkelte mindre feil i det tekniske grunnlaget for gjeldande reguleringsplan som også vil bli retta opp i og som planen vil bli tilpassa.

Det vert gjort konsekvensutgreiing for naturmangald og vassdragsmiljø, i tråd med Miljødirektoratet sin rettleiar M1914. Øvrige aktuelle tema vil bli omtalt i planomtalen.

Framdrift

Det vert no varsla oppstart av arbeidet med reguleringsendring. I etterkant av dette vil me utarbeide forslag til oppdatert reguleringsplan, som me vil sende ut til offentleg ettersyn. Me ventar at dette vil skje våren 2026.