Etter jordraset ved Nesvatnet 30. august i fjor, har Nordlandsbanen vore stengd for gjennomgåande trafikk. I oktober bad Jernbanedirektoratet SJ om å etablere ein midlertidig verkstad i Bodø, for å kunne ta opp igjen trafikken nord for Levanger. Bane NOR har bygd verkstaden på rekordtid, og dette gjer det mogleg å ta opp igjen trafikken før arbeidet ved rasstaden er ferdigstilt. Det er viktig både for person- og godstrafikken.

Vanlegvis vedlikeheld SJ toga sine i Trondheim og på Støren.

– Det har vore avgjerande for oss å legge til rette for at SJ Nord så raskt som mogleg fekk tilgang til verkstad på nordsida av skredet. Toga som var nord for skredet var utan moglegheit til å bruke verkstadane sine.  Dette har prega både driftsstabiliteten og tilbodet til dei reisande, men no kan vi stolt presentere ei veldig god løysing, seier regiondirektør i Bane NOR, Thor Brækkan.

Avdelingsdirektør Erik Lund i Jernbanedirektoratet set pris på at jernbanefamilien kan samarbeide så godt, og at vi har ein struktur som gjer at vi evner å handtere slike utfordringar:

– Eg vil særleg rose Bane NOR Eiendom for at dei har jobba raskt og målretta for å få opp ein midlertidig verkstad. Hendingane som har ramma jernbanen i Noreg, særleg langs Nordlandsbanen og Dovrebanen, viser kor viktig det er at vi har ein robust infrastruktur som kan takle dei vêrmessige utfordringane vi vil få flere av framover.