Har du prosjekteringsleiareigenskapar og lyst til å legge premissane for Noregs største tunnelprosjekt? Kan du tenke deg nye utfordringar i eit megaprosjekt der du jobbar med både veg og bane for to av dei største byggherrane i landet? Kan du tenke deg å samhandle med dyktige rådgjevarar gjennom vår store rådgjevarkontrakt? Då er dette jobben for deg!

Fellesprosjektet Arna - Stanghelle (FAS) er Noregs største tunnelprosjekt, og er eit samarbeidsprosjekt mellom Statens vegvesen og Bane NOR. Det skal byggjast nesten 80 km tunnel som eit tunnelsystem for veg og bane. Prosjektet omfattar to nye jernbanestasjonar og nye kryssløysingar for veg i dagsonene. Byggestart for førebuande entreprisar var våren 2025, og byggestart for første tunnelentreprise er planlagt hausten 2026. Prosjektet vil verte gjennomført av Statens vegvesen og Bane NOR med felles organisering, prosjektering og bygging.

Som prosjekteringsleiar er du ansvarleg for at prosjekteringsprosessen vert følgd for fagområda veg og grunnarbeid i FAS. Dette omfattar fag som veg, underbygning bane, overvatn, vatn og avløp, og geoteknikk.

Stillinga skal bidra til at det vert prosjektert gode, optimaliserte og byggbare løysingar i samsvar med gjeldande regelverk og prosedyrar, og som oppfyller krav til sikkerheit, kostnader, ytre miljø, framdrift og kvalitet. FAS har også ambisjon om å utfordre regelverket der det kan gi gevinst for kostnader og/eller klimagassutslepp. Prosjektet skal inngå avtale med rådgjevar som prosjekterer alle hovudentreprisene i FAS. Dette er ein rammeavtale med éin leverandør som i 2026 skal starte med prosjektering av designbasis for prosjektet. Prosjekteringsleiar for veg og grunn skal saman med dei andre prosjekteringsleiarene i FAS samarbeide tett med rådgjevar for å nå måla for prosjektet. Som prosjekteringsleiar er du oppgaveleiar for fagressursar i Statens vegvesen og Bane NOR, og du skal etablere, leie og utvikle teamet med fagressursar innan ditt fagområde. Stillinga rapporterer til Prosjektleiar prosjektering.

Leiing i Statens vegvesen

 

Som leiar i Statens vegvesen forventes det at du følgjer leiarprinsippane våre - vårt felles kompass for godt leiarskap:

• Sett retning - eg ser framover, varetek heilskapen og viser veg.
• Ver til stades - eg lytter, tek vare på medarbeiderane og motiverer til innsats.
• Skap saman - eg er drivkraft for samarbeid og deling. Eg gjer det trygt å utforske nye moglegheiter.

Prinsippa byggjer på våre verdiar og gir retning for korleis vi leier, samhandlar og utviklar oss - både som enkeltleiarar og som organisasjon.

Kvifor skal du velje oss?

 

I dette prosjektet blir du ein del av både Statens vegvesen og Bane NOR. Prosjektet vil vare i 14 år og her er ei unik moglegheit til å jobbe for to av Noregs største byggherrar samtidig. Her vil du påverke samfunnsutviklinga til eit svært etterlengta samferdselsprosjekt, der vi skal prosjektere og bygge ny veg og bane i eit skredfarleg område.

Som tilsett i Statens vegvesen blir du ein del av eit solid og kunnskapsdelande fagmiljø. Hos oss får du mange moglegheiter gjennom å bli ein del av eit landsdekkjande, solid og viktig verksemd. Samtidig er det også opp til deg å bidra til rørsle og kontinuerlig utvikling - både for deg sjølv og for oss.

Vi jobbar for alle - for deg og meg - og har ein reell påveknad på folks kvardag. Du får ansvarsfulle oppgåver og høve til fagleg og personleg utvikling. Vi tek godt imot deg i eit godt arbeidsmiljø over heile landet.

Vi tilbyr deg også desse goda:

• Fleksitid og avspasering - vi veit at balansen mellom arbeid og fritid er viktig, og vi tilbyr fleksible arbeidstider.
• God pensjonsordning og lån - trygg fremtid med gode pensjonsordningar og gunstige lån.
• Trening i arbeidstida - moglegheiter for trening i arbeidstida eller støtte til treningsaktivitetar.
• Faglig påfyll - mange moglegheiter for kurs og vidareutdanning.

Lønna di blir avtalt i samsvar med lønnspolitikken vår.

Du får også:

• Ein viktig posisjon i eitt av Noregs største samferdselsprosjekt
• Ei utfordrande og ansvarsfull rolle i eit svært spennande arbeidsmiljø med engasjerte og dyktige kollegaer
• Ansvar og fagleg oppfølging hjå to av Noregs største byggherrar samtidig
• Gode faglege utviklingsmoglegheiter

  Arbeidsstad vil vere anleggskontor i Arna. Fram til dette er etablert vil arbeidsstad vere i Bergen sentrum. Heimekontor etter nærare avtale

Kvalifikasjonskrav

 

Du må ha:

• 3-årig ingeniørutdanning frå universitet eller høgskole. Ved relevant og lang erfaring, kan utdanningskravet fråvikast
• Erfaring frå tilsvarande rolle
• Stillinga krev førarkort klasse B
• Du har god norsk munnleg og skriftleg formidlingsevne

Du kjenner deg igjen i fleire av desse punkta:

• Erfaring med samferdselsprosjekt frå byggherre-, rådgjevar eller entreprenør
• Erfaring med prosjekteringsprosessar i samferdselsprosjekt
• Erfaring med Teknisk regelverk i Bane NOR og Handbøker i Statens vegvesen
• Erfaring med bygging og leiing av team
• Du trivest med å jobbe med menneske og ser på utfordringar som moglegheiter for utvikling
• Du er oppteken av godt samarbeid og har gode kommunikasjonsevner
• Du er komfortabel med å jobbe på digitale plattformer

Dersom du har teke heile eller delar av utdanninga di i utlandet, tilrår vi ei autorisert omsetjing av papira og godkjenningane dine frå HKDIR (https:hkdir.no/utdanning-fra-utlandet).

Som tilsett i Statens vegvesen er det dessutan viktig at du er tryggingsmessig skikka og har god dømmekraft, pålitelegheit og lojalitet.

Om søknadsprosessen

 

Krav til søknaden

Vi har gjort det enklare for deg! I staden for eit tradisjonelt søknadsbrev, ber vi deg svare på nokre relevante spørsmål. Hugs å fyll ut felta for "Utdannelse" og "Arbeidserfaring", og last opp vitnemåla dine og eventuelle attestar. Dette hjelper oss med å få eit godt bilete av bakgrunnen og kvalifikasjonane dine.

Testar og bakgrunnssjekk

For å sikre at vi finn den beste kandidaten, kan vi bruke arbeidspsykologiske testar som ein del av rekrutteringsprosessen vår. Desse testane gir oss innsikt i eigenskapane og ferdigheitene dine, og hjelper oss med å gjere ei rettferdig og objektiv vurdering, slik at vi finner den best kvalifiserte kandidaten. Vi gjennomfører også bakgrunnssjekk for å verifisere informasjon som er viktig for rekrutteringsprosessen.

Positiv særbehandling

Vi i Statens vegvesen verdset mangfald og ønskjer å skape ein inkluderande arbeidsplass. Vi oppmodar alle kvalifiserte kandidatar til å søkje. Om du har ei funksjonsnedsetjing, hol i CV-en eller innvandrarbakgrunn, vil du få moglegheit for positiv særbehandling.

Søkjarlista er offentleg

Dersom du ønskjer å reservere deg frå oppføring på offentleg søkjarliste, må du grunngi dette. Vi tek kontakt med deg dersom vi ikkje kan komme ønsket ditt i møte.

Statens vegvesen er hjartet i Noregs vegsektor, og vi jobbar kvar dag for å sikre eit effektivt, trygt og heilskapleg transportsystem. Som den største aktøren innan vegtransport i Noreg, har vi ansvaret for riks- og europavegane, samt tryggleiken til alle som ferdast langs vegen. Vårt oppdrag er å planleggje, byggje, drifte og vedlikehalde denne kritiske infrastrukturen.

Vi utviklar regelverk og standardar som gjeld for alle vegeigarar i Noreg, og gjennom vårt arbeid med trafikantar og køyretøy, ny teknologi og digitale tenester, sørgjer vi for at både folk og næringsliv har tilgang til enkle, effektive, trygge og miljøvennlege transportmoglegheiter.

Statens vegvesen består av to forvaltningsnivå – eit direktorat og seks landsdekkande divisjonar, som saman jobbar for å gjere vegane våre betre for alle.