– Ved å bruke teknologi til å hjelpe naturen, får vi færre stengingar for trafikantane, seier vegdirektør Ingrid Dahl Hovland.

I sommar og haust er det bygd 23 skredtårn på E134 Haukelifjell og riksveg 15 Strynefjellet, og i slutten av oktober kom dei siste magasina for sprengstoff på plass i skredtårna på riksveg 13 over Vikafjellet.

Hjelper naturen

Snøskredtårn er faste installasjonar som kan fjernstyrast via ein app. Herifrå kan skred løysast ut kunstig.

Slik hjelper Statens vegvesen naturen med å halde vegane opne og trygge. I tillegg til faren for snøskred over open veg, kan vegar bli stengde når det er fare for skred.

Men i staden for å stenge vegen medan naturen går sin gang, kan skred løysast ut frå skredtårna og ved hjelp av sprengstoff eller gass. Dermed får også entreprenørane som driftar fjellovergangane ein tryggare arbeidskvardag.

Meir opne vegar

Med skredtårna på Vikafjellet er Statens vegvesen i mål med å sikre nokre av dei viktigaste fjellovergangane i Sør-Noreg. Den fysiske infrastrukturen er på plass, og no blir teknologien vidareutvikla.

Statens vegvesen er i front med å utvikle og teste sensorar for snødjupn, snødrift og snødekke. Ein dronestasjon skal testast for å levere data til betre snødekkemodellar, som igjen skal gje betre snøskredvarsel. Ved hjelp av informasjon frå snøskredtårna blir vegane tryggare, samstundes som dei er minst mogleg stengde.

I mål med tårn i Sør-Noreg

I fjor blei det bygd skredtårn på riksveg 7 Hardangervidda, og dei første skredtårna kom opp på Haukelifjell. I løpet av to år er altså totalt 13 kjende skredpunkt på fire av dei viktigaste vegsambanda i Sør-Noreg sikra med 31 skredtårn.
Satsinga har kosta 65 millionar kroner, der dei fysiske installasjonane utgjer 55 millionar.

Betre skredvarsling

Statens vegvesen arbeider også med å utvikle eksisterande skredvarslingsanlegg, slik at trafikantar kan få informasjon i sanntid på skilttavler. I tillegg er det ulike forsøk med fiberkabel og radarløysingar som skal styrke moglegheita til å føreseie skred.

Held fram i Nord-Noreg

Neste år startar bygging av skredtårn på riksvegar i Nord-Noreg. I første omgang vil Statens vegvesen prioritere E69 i Nordkapp, riksveg 94 i Hammerfest og E6 Langfjorden i Alta. Prosjekteringsarbeidet på desse strekningane er allereie godt i gang.